- اسوء حاجه ممكن تحصلك فى لعبه اونلاين.. ارتفاع البنج ويكون عالي بيسبب لاج وتقطيع كثير فى اللعبه وفى الغالب بتكون في شبه عداد الموتي بسبب استجابه النت عندك .. فمثلاً ممكن يحصل عندك تقطيع وانت بتلعب ببجي و بعد كدا تلاقي نفسك في وسط ضرب نار مثلا او تلاقي نفسك ميت خلاص.
البنج شيء مهم جداً في الالعاب الاونلاين .. دايما صاحب البنج الاقل بيكون ليه الافضلية مهما كان الرقم بتاعك كويس .. وعشان كدا لو بتلعب فى بلاد برا والبنج بتاعك مثلا 5 او 10 هتحس بالفرق دا ..
اسباب ارتفاع البنج كثيره هنحاول نذكر بعض الطرق والحلول عشان نحاول نقلل البنج ونخف التقطيع واللاج الموجود فى اللعبه ..
طريقة تقليل البنج وحل مشكله اللاج وتسريع ببجي.
زي ما اتكملنا سابقاً فارتفاع البنج كفيل انو يدمر ليك تجربه اللعبه بالكامل... فلازم نشوف اي حلول لتقليل البنج وخفض الرقم .
- اعادة تشغيل الموبايل.
- ازالة التطبيقات الغير مهمة.
- تنظيف مساحة كافية من التخزين.
- اغلاق التطبيقات من الخلفية.
- تنظيف الكاش لببجي.
- استخدام Force 4x MSAA لتسريع اللعبة.
- استخدام اداة GFX Tool.
- اتسخدام مسرع الالعاب.
- اتصالك بالانترنت.
1- اعاده تشغيل موبايلك.
لو اللعبه كانت شغاله معاك بوضع طبيعي وفجأة دخلت فى دايرة التقطيع واللعبه بتهنج والبنج بيعلي .. جرب تعمل اعاده تشغيل للموبايل بتاعك فعمليه اعاده التشغيل هتوقف تطبيقات كثير شغاله فى الخلفية والموبايل هيفتح بوضع احسن.
2- ازاله التطبيقات الزائدة والمشبوهة.
التطبيقات الغريبة واللي ملهاش لازمه على موبايلك ممكن تكون سبب في ان موبايلك يتقل بعد فتره من اللعبه مش كبيرة .. وخاصة لو عندك تطبيقات مشبوهة ومش موثوقه فممكن مثلا شغاله فى الخلفية و بالتالي هتسبب ليك مشاكل كثيره منها ان الموبايل هيكون ثقيل.
اتخلص من كل التطبيقات اللى بقالك شهور مش بتستخدمها .. التطبيقات الغير موثوقه و نظف موبايلك كويس قبل ما تلعب ببجي.
3-تنظيف التخزين.
مساحة الموبايل المتاحة بتلعب دور مهم فى سرعة الالعاب .. كل ما كان موبايلك على وشك ان التخزين بتاعه يتملي كل ما كان الموبايل اتقل والنظام مخنوق بشكل اكبر ودا طبيعي انو يسبب ليك ثقل كبير فى الجهاز ويبان اكثر مع التطبيقات الثقيله زي ببجي او العاب تانية.
فدايماً نظف ذاكرة الموبايل بتاعتك .. وخلي في رقم كويس مساحه فاضيه لان دا هيخدمك انتا فى الالعاب وفي استخدامك للموبايل عموماً ودا شيء مش للموبايلات بس .. بل وعلي اجهزة الكمبيوتر ايضاً.
4-اغلاق اي تطبيقات في الخلفية.
احياناً ممكن تنسي تقفل التطبيقات بشكل كامل .. مجرد رجوعك وخروجك من التطبيق كدا دا مش معناه ان التطبيق تم اغلاقه تماماً ولكن التطبيق ما زال موجود وبيتشغل فى الخلفية .. وبيستهلك من موارد وامكانيات الموبايل بتاعك.
في بعض الموبايلات بتقفل التطبيقات دي بعد فتره معينه بالذات لو الموبايل بشغل حاجه ثانيه ومحتاج اداء اكبر .. ولكن في موبايلات آخري الموضوع دا هيسبب ليها بطىء وثقل كبير . وممكن يكون هوا سبب التقطيع واللاج في لعبه بابجي .
فدايما بعد ما تطلع من كل التطبيقات وقبل ما تفتح ببجي .. اضغط على الرز اللى بتنتقل منه بين التطبيقات المفتوحه .. واتأكد من اغلاق التطبيقات تماماً قبل ما تفتح لعبة ببجي .
5-مسح الذاكرة المؤقتة او الكاش للعبة ببجي.
ممكن تجرب تمسح ملفات الذاكرة المؤقته للعبه ببجي .. ودا مش معناه انك هتخسر حاجات كثير لا .. كل الموضوع ان بعد تنظيف الملفات دي هتسجل دخول مرة ثانيه للعبه .
تقدر تمسح الملفات دي عن طريق الدخول الى الاعدادات >> التطبيقات وتختار ببجي ، هيفتحلك اعدادات التطبيق اختار Clear Casche.
6-استخدام Force 4x MSAA .
دا عبارة عن خيار موجود فى خيارات المطورين بيخلي Gpu يشتغل بكفاءة اكثر ودا اوبشن مخفي في خيارات المطورين فانت الاول محتاج تفتح خيارات المطورين .. ودي خطوة سهلة شرحناها فى مقالة سابقة طريقة تفعيل خيارات المطور
بعد ما تفتح خيارات المطورين هتلاقي فيها خيار Force 4x MSAA .. احيانا بفعل الخيار دا خصوصاً فى هواتف الفئة المتوسطة .. ولكن دا هيسبب زيادة فى درجه حرارة الموبايل .. وبعد ما تخلص ببجي اقفل تفعيل الخيار دا عشان بيزود استهلاك البطارية.
7-استخدام اداة GFX Tool .
GFX Tool عبارة عن تطبيق متميز جداً متاح على المتجر بيقدر يخليك تحسن بعض الاختيارات منها الجرافيك .. فمثلا لو بتلعب بموبايل فئه متوسطه ممكن عن طريق التطبيق دا تلغي حاجات مش ضرورية فى الجرافيك ودا هيخليك تحصل على معدل اطارات اعلي Fps .. وممكن تزبط اعدادات الجرافيك وتخلي اخر مستوي ليها حد معين او عدد اطارات معين .
والاداة دي بتحسن اداء اللعبه بشكل كويس فى حالة تقليل الاعدادات شويا منها قبل ما تدخل للعبه وتتحكم في اعدادات الجرافيك وتتخلي عن التأثيرات الغير ضرورية ودا بيسرع اللعبه وادائها على موبايلك.
8-استخدام مسرع الالعاب على موبايلك.
معظم الموبايلات حاليا عليها خاصية اسمها Game Booster ..ودي بتساعدك انك تحصل على تجربة العاب مميزة بانها تخصص وتركز كل اداء الموبايل على اللعبه اللى شغاله حالياً..
ممكن تلاقي الوضع دا فى الاعدادات او فى برنامج الامان على موبايلك .. لو الوضع دا محتاج تفعيل .. فعله طبعاً ولو الامر محتاج انك تضيف الالعاب اللى عايز وضع الالعاب يشتغل معاها .. ضيف لعبه ببجي بكل سهولة.
9-اتصال الانترنت ببجي.
الانترنت السبب الرئيسي فى البنج العالي على اللعبه ..دايماً اتأكد ان الانترنت بتاعك شغال كويس .. مش بيقطع مثلا او ممكن يكون النت شغال تمام بس مفيش استمرارية بمعني بيروح ويجي.
ممكن حد مشغل يوتيوب مثلا وانت بتلعب او بحمل .. لو انت بتستخدم انترنت مشترك كل دي اسباب اكيد هترفع البنج عندك .. قبل ما تفكر في اي حلول للمشكلة اتأكد ان البنج عندك على الكمبيوتر او الموبايل فعلا كويس وان دي مش مشكله من الانترنت نفسو.
