-لما تشتري موبايل جديد "اولاً الف مبروك 💝" .. في بعض النصائح والحاجات اللى المفروض تعملها اول حاجه بعد ما تمتلك الهاتف .. بعد ما تشيل الموبايل بتاعك من العلبة الخاصة بيه اكيد انت سعيد بالموبايل الجديد بتاعك .. المفروض تعمل ايه بعد كدا ؟
هنا هنكلم عن اول الحاجات اللى المفروض تعملها بعد ما تطلع الموبايل بتاعك من العلبة الخاصه بيه .. وقبل اي حاجه ثانية بتيجي في بالك او قبل الاستخدام الحقيقي لموبايلك ..
اهم النصائح واول حاجه تعملها مع موبايلك الجديد:
- اتأكد من الموبايل ومواصفاته.
- حماية شاشة موبايلك.
- حماية ظهر موبايلك.
- الاعدادات الاساسية.
- تنزيل التطبيقات.
- التعرف علي جوالك.
*تأكد و راجع موبايلك جيداً.
المقصود بالنقطه دي انك خلاص فعلياً بقيت المالك الرسمي للجهاز .. خلاص انسي فرحة البدايات دي وتسرعها و صفي عقلك شويا عشان هتحتاجه وانت بتبص على الموبايل و بتراجع كل جزء فيه انو صحيح ومفهوش اي اخطاء
النقطه دي مهمة جداً في مستخدمين كثير اول ما بيجيبوا الموبايل بيبقوا متسرعين جداً .. وبينسوا يراجعوا الموبايل كويس وكل حاجه وان دا فعلا الموبايل اللى انت عايزه بالمواصفات اللى طلبتها وايضاً كل حاجه سلمية .. والتسرع دا عاده بيبقا في كل عمليات الشراء الجديدة وليس فى الموبايلات فقط .
طلع محتويات الموبايل اللى المفروض تكون موجوده .. جرب كل شىء واتأكد من الضمان اتاكد من كل حاجه و راجع كل حاجه قبل ما تخرج برا المحل او قبل ما تبدأ تستعمل الموبايل وتكتسف حاجه بعد كذا يوم او بعد اسبوع مثلاً.. فاهدي وركز فى النقطه دي.
*حماية شاشة موبايلك.
بعد ما تتأكد ان الموبايل تمام وان كل شىء مظبوط .. قبل ما تعمل اي حاجه ركب حماية للشاشة وقبل ما تستخدم شاشة الجهاز ودي من اهم النقط .. لو موجود فى العلبة حماية للشاشة وشايف انها رديئة وهتقول لنفسك مش هركبها لما ابقي اشتري واحده احسن 👀 لا ركبها ولما تشتري واحده احسن ابقي شيليها وارمييها عادي ..
متخرجش من المكان قبل ما يكون جهازك عليه حماية للشاشة .. ومتبدأش تستخدم الموبايل من غير حماية للشاشة.
*حماية ظهر الموبايل"اختياري"
ثاني حاجه المفروض تفكر فيها بعد ما تركب حماية للشاشة .. هو ظهر الموبايل خاصة ان دلوقتي موضوع ان ظهر الموبايل بقي زجاج منتشر جداً ... وتغيير الظهر دا لو حصله حاجه بعد الشر يعني .. مكلف جداً خاصة لو انت بتستخدم فلاج شيب مش موبايل فئة متوسطه وحتي لو بتستخدم موبايل فئه متوسطه هيبقي الظهر بمبلغ محترم برضوا ..
ممكن لو عايز تفضل محافظ على شكل الجهاز او عاجبك التصميم تلجأ للجرابات الشفافة .. هي دي اللى هتوفرلك حماية للموبايل من الصدمات وهتحافظلك شويا على ان شكل الموبايل يكون ظاهر .. اختار اللى يناسبك النقطه دي بترجع ليك بس انا من وجهة نظري انها نقطه مهمة جداَ.
*الاعدادات الاساسية للموبايل.
وهنا بقا هتبدأ تفتح الموبايل وتظبط الاعدادات الاساسية للموبايل واهم الاعدادات دي هيا الحساب سواء جوجل لو انت اندوريد او icloud لو انت ايفون اعمل حساب خاص بيك ولو انت عندك حساب ابدأ استخدمه و زبط جميع الاعدادات الاساسية.
*مرحلة تنزيل التطبيقات المهمة.
بعد تسجيل الدخول بالحساب المناسب للموبايلك .. افتح المتجر وابدأ في تنزيل التطبيقات المهمة والمناسبة ليك عشان تبدأ مرحلة الاستخدام وتجربة الهاتف والاستمتاع بتطبيقاتك المفضلة .
*اتعرف على موبايلك .
دلوقتي انت تقدر تستخدم موبايلك وتتعرف على المميزات الموجوده فيه وتستخدم التطبيقات المفضلة وتلعب كمان الالعاب اللى انت عايزها .. وبرضوا اعمل باسورد او نمط او شغل البصمة دا على حسب اختيارك.
موضوع شحن موبايلك الجديد.. انت لما تشتري الموبايل هتلاقي فيه شحن حوالي 60% تقدر تخلصهم اول لما يوصل مثلا 10-15% وتشحنه عادي وتجنب الشحنات اللى بتوصل 100%- 0%
