بعد ما المنافسة اصبحت كبيرة بين شركات الموبايلات .. كل شركة بتدور على انها تخلي الموبايل بتاعها مميز اكثر .. ومن ضمن المميزات الجديده المنتشرة الفترة دي هيا معدل تحديث الشاشة .. او Refresh Rate .. فمثلا تلاقي شركة نزلت موبايل 90Hz والمنافس ليها نزل موبايل بشاشة 120Hz وهكذا .. بس هل انت تشتري موبايل جديد كليا مثلا عشان بس تاخد معدل التحديث الجديد ؟ ..
- معدل التحديث العالي فى شاشات الموبايل بيخلي الشاشة اكثر سلالسة وبتديك اداء بشكل احسن بكثير خاصه فى الالعاب ومع الجرافيك وكدا .. بس ممكن تكلفك استهلاك بطارية اكبر ودا بيعتمد على الشركات والمتسخدمين ايضاً .. في مثلا شركات بتخلي الـت Refresh Rate للشاشة عالي بس بتاخد بالها من نقطه الاستهلاك دي وبتحاول تقللها شويا ولكن اعتقد انها هتفضل موجوده لفرق الجودة طبعا بين المعدل دا والمعدل الاقل .. وفي شركات ثانية لا .. والموضوع بيقا ملحوظ شوية فى استهلاك البطارية لما تبدأ تزود المعدل لانه بيبقي خيار موجود فى الاعدادات ..
ايه هوا معدل تحديث الشاشة او ماهو الهرتز في الشاشات ؟
-الشاشات مش حاجه ثابته.. وانت بتتنقل بين تطبيق وتاني واي حركه بتعملها فى الشاشه بتظهر بطريقة سلسة و smoth بسبب ان كل بيكسل فى الشاشة بيحصله تحديث "الشاشة بتتكون من بيكسلات" .. ولكن الموضوع والتحديث دا مش بيحصل بطريقة عشوائية لا .. دا بيحصل فى فترات او حاجه بتسمي "معدل التحديث "
-معدل التحديث عبارة عن قياس لسرعة تحديث الشاشة .. وطبعا طالما بنكلم عن قياس فأكيد فى وحدة وهيا بقا الهرتز او Hz .. معدل التحديث بيعد عدد المرات اللى الشاشة بيحصلها تحديث فى الثانية .. فمثلاً 60 هرتز يعني 60 مرة كل ثانية .. و 90 هرتز يعني 90 مرة كل ثانية .. 120 هرتز يعني 120 مرة كل ثانية 120 times Per Second.
-معدل التحديث 120 هرتز بيحدث اسرع من 60 هرتز مرتين واسرع من 30 هرتز اربع مرات ..
-شاشة موبايلك مش بيحصل ليها تحديث كدا مرة واحدة لا .. كل صف افقي من البيكسلات بيحدث واللى بعده واللى بعده لحد ما الشاشة كلها تتحدث ودا طبعا بيحصل فى جزء من الثانية .. الموضوع بياخد 16.6 ملي ثانية عشان شاشة 60 هرتز يحصلها تحديث و 11.1 ملي ثانية عشان شاشة 90 هرتز يحصلها تحديث .. و 8.33 ملي ثانية عشان شاشة 120 هرتز يحصلها تحديث " الثانيه فيها 1000 ملي ثانية "
فشاشة موبايلك بيحصلها تحديث ولكن ليها حاجه زي دورة زمنية كدا عشان يحصلها تحديث لكل الشاشة..
ما الفرق بين 60 هرتز و 90 هرتز و 120 هرتز ؟
-زي ما قولنا فى اول المقالة ان كل ما معدل التحديث دا بيزيد بيخلي حركتك وتنقلك بين التطبيقات مثلا اكثر سلالسة و smoth اكثر .. ولكن تصفحك على اليس وانك تتصفح ايميلك والحاجات دي مش هتلاحظ فروقات كبيرة فوق 60 هرتز .. الموضوع بيبقا ملحوظ اكثر بقا لما بيجي لنقطه الالعاب .. فبيديك فريمات اكثر ودي كلمه ممكن تسمعها كثير فى الالعاب فمثلا لو ليك فى الالعاب على الكمبيوتر هتلاقيها شغاله على 120 فريم فى الثانية وممكن كمان 144 فريم فى الثانية .. فدلوقتي ممكن يحصل نفس الشىء فى الموبايلات ودا اللى هيخلي اللعبه تظهر بجرافيك احسن بكثير ..
اكتشف ما هي الشريحة الإلكترونية التي ستحل محل الشريحة الموجودة بهاتفك الان عبر الموضوع التالي " ما هي الشريحة الإلكترونية المدمجة؟ "
هل معدل التحديث العالي بيأثر على البطارية ؟
-لسوء الحظ الاجابة ايوة , بس الموضوع بيعتمد على حاجات كثير منها المعالج والسوفت وير بتاع الموبايل .. الشاشة ال 90 هرتز فى اختبارات كثيرة لهاتف وت بلس 7 برو كانت بتستهلك البطارية بوقت اسرع شويا لو قارنتها بمعدل التحديث الاقل وهوا 60 هرتز .. ودا شىء طبيعي يعني بس المهم ان يكون الفرق مش كبير جداً ..
هل تشتري موبايل بمعدل تحديث اعلى Refresh Rate ؟
معدل التحديث فى الشاشات حاجه منتشرة دلوقتي فى المنافسة بين الشركات , ولكن معدل التحديث جزء صغير من امكانيات الشاشة , فأكيد هيا مش شىء اساسي يخليك تبني اختيارك كلو مثلا لموبايل معين .. يعني مش خيار كافي تختار بيه موبايل بس انك تختاره عشان معدل تحديث اعلي وبس ...وفى حاجات ثانية مهمه فى الشاشة زي كثافة البيكسلات مثلا او الدقة او حتي نوع الشاشة نفسها ..
وكدا وصلنا لنهاية المقال ♥ ، تابعنا على فيسبوك وتويتر ودمتم بخير
