اعرف مين بيراقبك على الواتساب ؟ .طريقة حماية حسابك من التجسس ومعرفة اذا كان هنالك شخص يقوم بمراقبتك على تطبيق واتس اب .
- تعرف ازاي مين بيراقبك او بيتجسس علي حسابك على الواتس اب ؟ لو انت شاكك ان حسابك على الواتساب غير آمن وان في حد ثاني .. ممكن يكون بيراقب الشات الخاص بيك وبيتجسس على حسابك بالكامل .. وممكن حد يتجسس عليك عن طريق واتساب ويب ودي طريقه معروفه و لو انت بتستخدمها اظن ان انت هتكون عارف لو حد جرب يستخدمها فى مراقتبك.
واتساب ويب خاصية قوية جداً ومستخدمين كثير بيستخدموها عشان يفتحوا الواتس اب على الكمبيوتر سواء لتحميل ملفات او حتي للاستخدام العادي فى الشات .. او احياناً مع الحسابات الخاصه بالعمل .. فانت مش محتاج اي تطبيق كل اللى بتعمله بتفتح الموقع الخاص بالواتساب ويب وعن طريق كود بتعمله مسح بالكاميرة على موبايلك بتقدر تفتح الحساب بتاعك على الكمبيوتر ..
طريقة معرفة اذا كان حسابك على الواتساب يتم استخدامه على جهاز آخر؟
عشان حد يراقب حسابك ويتجسس عليك على واتس اب كل اللى هوا محتاجه تليفونك لثواني و بيمسح الكود على واتساب ويب وبووم !! 💥
دلوقتي يقدر يشوف نسخه كامله من الواتس اب الخاص بيك , رسائل وصور وجهات الاتصال وايضا المجموعات والشات القديم. واي حاجه هتستلمها هتوصل للجهاز اللى مفتوح عليه حسابك .
ازاي تعرف وتلاحظ اذا في اي حد بيتجسس وبيراقب حسابك ؟
زي ما قولنا ان الطريقه بالبساطة دي وفى ثواني وخطوات بسيطه ولكن في الحقيقه الموضوع مش سهل للدرجه دي وانك تعرف ان حد بيستخدم واتساب ويب لحسابك بيكون ظاهر .. فاكيد شركة واتساب عامله احتياطات للموضوع دا
اول حاجه تقدر تعرف الاجهزة اللى فاتحه حسابك عن طريق انك تفتح تطبيق الواتس اب وتضغط على الثلاث نقط اللى فوق " اللى يتفتح منهم الاعدادات "
وهتلاقي من ضمن الخيارات "واتساب ويب" الخيار دا قبل ما تختار الاعدادات اصلا ..
ودي صورة للتوضيح :
هنا بيظهر ليك الاجهزة اللى فاتحه حسابك على الويب او على الكمبيوتر وايضا الاجهزة اللى انت استخدمتها قبل كدا ..
لو ظهر ليك اي اجهزة مش تبعك اختار خيار "تسجيل الخروج من جميع الاجهزة"
وعشان تحمي نفسك من الموضوع دا دايماً اقفل تطبيق الواتساب الخاص بيك برقم خاص غير الرقم بتاع الموبايل 🔒
بمعني انك لو قافل الموبايل بباسورد .. اقفل التطبيقات المهمة ليك زي الواتساب برضوا بباسورد.
ولاحظ: ان بمجرد ما حسابك بيتفتح على الكمبيوتر بيجيلك اشعار على الموبايل ان الحساب دلوقتي مفتوح علي الكمبيوتر .. بس لو مخدتش بالك من الاشعار دا وفتحت واتساب واستخدمته فتره ممكن الاشعار دا يختفي وبعد كدا لو فتحت الاشعارات مش هتلاقيه.
فلاحظ دايما ان الاشعارات اول ما الموضوع دا يحصل هيجيلك اشعار.
الطريقة الثانية فى التجسس على حسابك هوا ان اي حد يحاول يشغل الواتساب بتاعك على موبايلك بمعني :
انو ينزل تطبيق الواتساب ويسجل برقمك ولكن هيفضل كود التأكيد اللى طبعا مش هيعرف يجيبوا الا من على موبايلك .. يعني انو يكون معاه الشريحه الخاصه برقمك مثلا..
في الحالة دي هيدخل حسابك على الواتس اب وياخد نسخه من الشات والباك اب الخاص بيك ..
وهيظهرلك علي موبايلك رسالة "This phone could not be verified”
You can re-verify your number to regain the account access.
ان فى مشكلة في تأكيد الرقم و دا بسبب ان الحساب بتاعك زي ما شرحنا اتفتح علي موبايل ثاني ..
وممكن طبعا ترجعه عن طريق انك تعمل عمليه تأكيد تاني لانك صاحب الرقم .
وفى طرق اكثر عشان تأمن حسابك على الواتساب شرحناها فى مقال "ازاي تأمن حسابك على الواتساب" من ضمنها طريقه التأكد بخطوتين اللى مهمة جدا ف الحماية لو عايز تعرف اكثر ..
كدا عرفت الطرق اللى ممكن اي شخص يعملها عشان يراقب حسابك او يتجسس على الشات والصور الخاصه بيك ودلوقتي انت قادر تحمي حسابك من اي عمليه تجسس .. والرابط اللى فوق عشان تحمي حسابك ايضا من الاختراق.
وكدا نكون وصلنا لنهاية المقال
متنساش تتابعنا علي فسيبوك وتويتر
دمتم بخير ♥
